• euskal konfederazioa
• euskal hedabideak
• manifestaldia

Euskarari trabarik ez! Euskarak bizi behar du!

2023-04-13

Euskarazko eta Ipar Euskal Herriko 5 hedabideen ordezkariak biltzen dituen Euskal Hedabideak elkarteak, Euskal Konfederazioak antolatu apirilaren 22ko “Euskarari trabarik ez! Euskarak bizi behar du!” manifestaldiaren deialdiarekin bat egiten du, deitzen ditu halaber bere irakurle, entzule, ikusleak parte hartze masibo batera.

Badu hilabeteak azterketen euskaraz egiteko eskubidearen gaia pil-pilean dugula. Hezkuntza ministeritzak emandako erantzunak ez du arazoa bere osotasunean konpontzen. Eskaera ozen eta zabala adierazi eta errepikatu dute alta Ipar Euskal Herriko hautetsi gehiengoek.

Baina azterketen gaia baina haratago, euskalgintzako eragileen kezka eta haserrea zabalduz doa. Izan ere, eguneroko oztopo dugu hizkuntza politikaren anbizio eskasa, emanak zaizkigun laguntzek ez dituzte bermatzen gure betebeharrak, hots, ez ditugu gure misioa betetzeko ahalak. Gaur, baldintza hauetan, Euskararen Erakunde Publikoak (EEP) ezin ditu bete bere sorreran emanak izan zaizkion helburuak.

Gure kasuan, euskal hedabideen kasuan, gaur egun lan egiteko ditugun ahalek ez digute garapenerako aukerarik ematen, ezin dugu eduki berririk sortu, ezin dugu euskaldun orok merezi duen eskaintza kualitatibo eta aberats bat bermatu.

Ondorioz eskatzen dugu instituzioei, eta batez ere hizkuntza politikaren ardura dutenei, salbuespeneko laguntzetatik haratago, gure hedabideak iraunkorki finantzatu ditzaten, edo laguntza zuzena eskainiz edo publizitate erosketa bidez.

Izan ere, euskarazko hedabideetako lan taldeek euskarazko edukiak eskaintzeko ahalak behar dituzte, frantsesezko hedabideek proposatu eduki anitzekin lehiatu daitezkeenak.

Euskal hedabideen funtzio eta kalitatea onartua da, txalotu eta goresten da, baina orain biziraupen eta garapena segurtatuko duten ahalak jarri behar dira mahai gainean.

Ondorioz apirilaren 22an karrikan izango gira, zeren Euskal Hedabideek bizi behar dute, euskarak bizi behar du!

* Euskal Irratiak (5 irratien federazioa), Kanaldude Telebista(Aldudarrak Bideo), Kazeta (Mediabask), Ipar Euskal Herriko Hitza (Berria) eta Herria astekaria.