• sorkuntza
• zinema
• fikzioa
• dokumentala
• festibal
• egonaldia
• proiektu

HEMENDIK egonaldian aurkeztutako hiru proiektu sustengatuko ditu Kanaldudek

2024-06-21

Apirilaren 30etik maiatzaren 2ra, Rencontres sur les docks festibalaren baitan, Zukugailua elkarteak Baionako L´Atalante Zinemarekin partaidetzan antolatutako HEMENDIK egonaldiaren laugarren edizioan, Kanaldude telebistak hiru proiektu sustengatzea erabaki du. EZ DA LURRIK Itziar Lamarka eta Sara Martorana-rena, R.S (Republique Sexuelle) Justine Fabre-rena eta TXANTXANGORRIA Alice Lahourcade-rena. Proiektu bakoitzak, idazketara zuzendutako 1.200 euro jasoko ditu.

Egonaldi honek zinema sorkuntza sustatu nahi du Akitania, Euskadi eta Nafarroako lurraldeetan, mugez gaindi garatuko diren proiektuen bidez hain zuzen. Euroeskualdeko lurraldearekin lotuak diren film luze eta laburrak, dokumental zein fikzioak.

HEMENDIK egonaldian, hiru egunez, proiektuen eramaileek beraien proposamenak garatu zituzten zinemagintzako profesionalen laguntzarekin. Nafarroa, Euskadi eta Akitaniako ekoizleen aitzinean aurkeztuak izan ziren maiatzaren 2an antolatutako pitching saio batean. Aipatzekoa da ere, egonaldian bi aholkulari izan zirela; Garbiñe Ortega zine-komisarioa eta Felix Salgado ekoizlea.

Sinopsiak:

EZ DA LURRIK:

Euskal Herrian baso trinko bat. Soilgune batean baserri zahar bat dago. Bertan bizi dira Ireneren aiton-amonak, Juana eta Tomas. Irenek bederatzi urte ditu eta Bartzelonan bizi da bere ama Uxuerekin, baina urtero etortzen dira baserrira uda pasatzera. Tomas dibertigarria eta goxoa da, baratza zaintzen erakusten dio Ireneri. Bere amona Juana, berriz, sukaldea eta basoaren artean bizi da. Inguruko landare eta sendabelar guztiak ezagutzen ditu, eta batez ere, inork baino hobeto dakizki bertako kondaira zaharrak. Irenek izugarri maite ditu amonaren istorioak. Aurten, baina, ama-alabak mudantzarekin laguntzeko etorri dira. Abiadura Handiko Trena bertatik igaroko da eta trenbide berria eraikitzeko etxea eta lurren gehiengoa kendu dizkiete aiton-amonei. Uxuek ahalik eta azkarren amaitu nahi du prozesu guztiarekin, baina Juanak ez du bere familiaren etxea utziko azkeneraino borrokatu arte. Tomas alaba eta emaztearen arteko bitartekari izaten saiatzen da, baina ez dago modurik mokoka aritu ez daitezen.

R.S ( Republique Sexuelle):

2028ko udaren amaieran, inflazioa punturik altuenean dagoenean, eta eskuin muturra boterean dagoenean, R eta S, aspalditik elkartzen dira, Frantzia eta Espainiaren arteko mugan ibilaldi bat egiteko. Frantziako gobernu murriztaile baten aurkako eztabaida kritikoekin nahasten dira haien urratsak. Ibardin-en lepoak desio komunak sortzen ditu, eta naturako grunio batek dei gisa egiten du oihartzuna.

TXANTXANGORRI:

Euskal mendien erdian, jendarme bat mendi-ibilbideetan barrena dabil. Goiz hartan agindu bat jaso zuen: herri bakoitzeko txantxangorriak harrapatu behar ditu . Agindu honen zentzua eta xedea bilatu gabe, jendarmea agindua betearazten hasten da. Txoriak harrapatzea besterik ez du buruan, eta gertaera bitxiei egin beharko die aurre.