partekatu sarean:

Sarebide proiektuaren aurrerapenak Ipar Euskal Herrian

2026-11-19

Sarebide Partzuergoaren bilera egin da gaur Hendaian, eta proiektuko kideek azken hilabeteetan egindako lana eta datozen urratsak aurkeztu dituzte. Erakundeetako ordezkari hauek izan dira bertan: Emile Duteya, Akitania Berriko hautetsia; Aroa Urdangarin, Eusko Jaurlaritzako ordezkaria; Maider Behotegi, Euskararen Erakunde Publikoko lehendakaria; eta Marie Heguy, Euroeskualdeko ordezkaria.

Sarebidek euskararen erabilera sustatzea du helburu, mugaz gaindiko hedabideen arteko lankidetzaren bidez. Horretarako, euskarazko ikus-entzunezko edukiak jende gehiagorengana iristeko eta Euskal Herriko lurraldeetako gertakarien berri emateko tresna eta baliabide berriak garatzen ari da.

Proiektuak hiru lan-ildo nagusi ditu: hedabideen arteko lankidetza teknologikoa indartzea, euskarazko eduki digitalak zabaltzeko sistema berriak garatzea eta adimen artifizialaren zein lengoaia naturalaren prozesamenduaren alorreko tresnak ikertzea eta aplikatzea.

Azpiegitura digital partekatua

Bidarten kokatutako datu-zentroan zerbitzari berriak jarri dira, Sarebideko hedabideen azpiegitura digitala indartzeko. Euskal Irratien webguneetako azpiegitura bertan dago jada, eta Kanaldude telebistaren ikus-entzunezko artxiboak eta zerbitzu digitalak migratzeko lanean ari dira. Azpiegitura horrek, halaber, BERRIAren artxibo digital berria eta garatzen ari den ikus-entzunezko plataforma hartuko ditu.

Tokiko azpiegitura teknologiko baten aldeko hautuak burujabetza digitala indartzea du xede: kanpoko hornitzaileekiko mendekotasuna gutxitu, edukiak eta zerbitzuak Euskal Herrian gorde, eta tokiko gaitasun teknologikoei zein ekonomiari ekarpena egin.

Musika- eta ikus-entzunezko plataforma berriak

BERRIAk Musika Berria plataforma garatu du, Badok-en oinarritutako proiektu berria. Streaming bidezko musika-eskaintza eta Euskal Herriko musikaren inguruko informazioa bilduko ditu, entzute-esperientzia eta eduki digitalen hedapena hobetzeko.

Ikus-entzunezko euskarazko edukien eskaintza bateratu eta zabala osatzeko plataforma ere garatzen ari da Sarebide. Plataformaren diseinua eta garapena Ideable enpresari esleitu zaizkio. Helburua da euskarazko ikus-entzunezko edukiak eskaintza bakarrean biltzea, hedabideen arteko elkarlana erraztea eta ikus-entzule gehiagorengana iristea.

Irratien eta Kanalduderen lana

Sarebideko lankidetzaren barruan, Ipar Euskal Herriko bost irratik beren azpiegitura teknologikoak berritu eta audio-sare digital bateratua garatuko dute. Estudioetako ekipamendua eguneratzeak eta irrati arteko konexio digitalak hobetzeak edukiak eta baliabideak partekatzea ahalbidetuko du, bakoitzaren nortasuna eta lurraldearekiko lotura gordez.

Kanaldudek, bestalde, bi bideo-muntaketa estazio berri erosi ditu, eta emisio-sistema modernizatzen ari da. Ekipamenduen eta artxiboen segurtasuna indartzeaz gain, emisio jarraitua bermatzeko hobekuntzak egin ditu: programazioa kudeatzeko interfazea eguneratu, edukien sailkapena eta jarraipena automatizatu, eta eguraldia, agenda edo albisteak sortu eta emititzeko tresnak garatu ditu.

Datozen urratsen artean daude emisio-sistema nagusiaren ordezko kopia bat zerbitzari partekatuan ezartzea eta Sarebideko bazkideen arteko eduki-trukea erraztea. Hala, proiektuak azpiegitura digital partekatua eraikitzen jarraituko du, euskarazko informazioa, musika eta ikus-entzunezko edukiak zabaltzeko.

Zer berri

ikusi denak