• kantuen kontrabandista

KANTUEN KONTRABANDISTA | Arrosa Xuriaren Azpian

2022-07-22

Xabaltx, gure zaldun eta kultur kontrabandistak, Lafiteniako hondartzan iratzartu ondotik, Arrosa Xuriaren Azpian izeneko kantu baten bila joatea erabakitzen du. Baina kantu honen musikaren bi bertsio oso desberdin atxematen ditu Azkue eta Aita Donostiaren liburuetan.

Donibane-Ziburuko gaztetxearen ondotik pasatzen delarik, txalaparta soinuak erakartzen du eta bertan lagunduko dion musikariren bat aurkitzeko esperantzarekin atea jotzera hurbiltzen da. Txomin Dhers txalapartariaz lagundurik kanta zahar kutsu haundienari pista segitzea erabakitzen du, hala nola, garai batean Senperen kantatzen omen zen bertsioa. Kantu honek ustez Napoleoi garaian gertatu bortxaketa baten ixtorioa kontatzen duelakoan, Senpereko ikerle eta aditu batzuengana joatea deliberatzen du Xabaltxek.

Hainbat pista ukanen ditu handik : ustezko sorginen aurkako De Lancrek eraman epaiketa aipatuko diote, baita garai bateko kantu zaharrak ezagutzen dituen Terexa Ibarra ere.

Elementu guziak bildu eta, Sara eta Bera lotzen dituen kontrabandisten bidexka sekretuetatik pasako da, Willis Drummond eta Pettirekin hitzartuz beren entsegu gelan.