• euskal hedabideak
• proiektu
• ikus-entzunezkoa

SAREBIDE euskarazko komunikabideen arteko lankidetza proiektua abian da

2025-06-18

Publiko berriengana iristeko helburuarekin, Berria egunkaria, Hamaika Telebista, Euskal Irratiak, Kanaldude Telebista, Euskalerria Irratia eta Elhuyar Fundazioak osatzen duten SAREBIDE proiektuaren lehen urratsak hasiak dira. Maiatz bukaeran bazkideen arteko lehen bilera burutua izan zen Berria egunkariak Andoaingo Martin Ugalde Kultur Parkean duen egoitzan.

2025etik 2027ra garatua izanen den proiektuak hiru oinarri izanen ditu; bost komunikabideen gaitasun teknologikoak eguneratzea, sistema digital berriak garatzea euskarazko ikus-entzunezko edukiak eta musika banaketa errazteko, eta adimen artifizialeko teknologiak ikertzea eta aplikatzea, edukien kudeaketa eta erabiltzaileen esperientzia optimizatzeko.

SAREBIDE proiektuak hainbat emaitza aurreikusten ditu;  edukiak kudeatzeko eta trukatzeko CMS sistema, euskarazko ikus-entzunezko ekoizpen partekatua, ikus-entzunezko plataforma digital partekatua eta musika-plataforma partekatu bat.