• festibala

FAANA Akitania Berriko irudi eta soinu egileen festibala

2023-09-26

ARGAZKIA | Jean-Louis Dubois Chabert

Irailaren 23tik 25era iragan da FAANA Akitania Berriko irudi eta soinu egileen festibala. NAAIS (Association des Auteurs et Autrices de l’Image et du Son en Nouvelle-Aquitaine) eta CREA (Association culturieuse de territoire, cinéma et spectacle vivant) elkarteek Saint-Georges-de-Didonne-n  antolatu festibala, bi urte guziz egiten da, aurten bigarren edizioa izan delarik.
 
Festibal honen helburua, Akitania Berriko egileen zinema, ikus-entzunezko eta irrati sorkuntzak hedatzea da, eskualdeko egileak aski erakutsiak ez direlako. Festibal honetan, zinema, ikus-entzun eta irrati arloko langileak elkartzen dira eta publiko zabalago batekin partekatzea dute helburu.

Hiru egunez, filma hedapen publikoak egin, langileak elkartu eta publikoarekin mintzaldiak dira. Kolegio eta lizeoekin irudi eta soinu arloan heziketa bat egiten da ere.

Kanalduderen parte hartzeari dagokionez, telebistaren izenean Loïc Legrand-ek parte hartu du mahain-inguru batean. Mahain-inguru horretan profesionalak elkartu dira eta “Filmen hedapena eskualdeko kate eta plataformetan” gaiaz aritu dira.

Kanaldudek mahain-inguru horretan parte hartu du, Akitania Berria eskualdeko telebista bat izanik, eskualdearen sustengua duelako, ala nola koprodukzio batzuen sortzeko. Legrand-en hitzetan "euskara mediatikoki eta kulturalki bizi behar da eta hori sartzen da Kanalduderen helburuetan, telebistaren helburua, Ipar Euskal Herrian euskarazko telebista bat egitea delako".

FAANA-n adierazia izan da herri-telebistaren berezitasuna, kate parte-hartzailea eta kooperatiboa delako. Horrek jendeekin lan egiteko manerak aldatzen ditu koprodukzioen sortzeko, egiazko elkarlan bat sortzen delako. "Usu hautatuko dugu egile baten lehen filma; laguntzen dugu ezagutarazten eta zinema gelekin harremana egiten dugu koprodukzioak hedatuak izaiteko. Filma haiek zinema geletan pasatu ondotik, gure webgunean eta telebistan partekatuak dira eta urririk ikusten ahal dira".

Legrand-ek koprodukzioen gaiak aipatu ditu ere. Bi gai mota azpimarratzen dira ahalik eta gehien: koprodukzioak, zuzenki lotuak edo ez Euskal Herriari, bainan Euskal Herriarekin parekatzen ahal direnak. Bigarren kasuan, “Mascarades” dokumentalaren adibidea eman du. Dokumental hori Bolibian gertatzen da eta kinoaren ekoizpena nola aldatzen den erakusten du konkurrentzia ainitz sortu denetik. "Teknologia sartu nahi da eta pestizidoak geroz eta gehiago erabiltzen dira. Hori parekatzen ahal da euskal laborantzan izan diren aldeketekin".

Legrand-ek gehitu ere, "Kanaldude, eskualdeko telebista bat izateaz gain, Euskal Herriko euskarazko telebista, parte-hartzailea eta ekoizpen berrien bultzatzailea da".