• zuzenean
• nahieran
• aplikazio
• programazioa
• mugikor

Kanaldude telebistaren aplikazio berria mugikorrean

2024-03-28

Android eta Apple sistementzako egokitua den eta erabiltzaileei esperientzia eroso bat eskaintzeko helburua duen App berria argitaratu du Kanaldudek, CodeSyntax enpresarekin elkarlanean.

Android eta Apple sistementzako aplikazioa, Play Store zein Apple Store-an telekargatu daitezke. Hemen eskuratu ANDROID edo APPLE sistema.

Kanaldude, lurraldeko telebista bat izanik, dinamika lokalak eta lurraldeen arteko trukaketak argitan ezartzen ditu, hurbileko informazio sozial bat eskainiz. Telebista parte-hartzailea, programen ekoizpenean herritarrei leku garrantzitsu bat ematen deiena eta edukien hedapenari begira, molde eta euskarri ezberdinak plantan jartzen dituena.

Aplikazio berri honek, 24 oreneko zuzenezkoa jarraitzeko, eduki guztiak nahieran ikusteko, aste osoko programazioa argitan emateko eta erabiltzaileek beharrezkoak dituzten informazio gehigarriak eskaintzeko helburua du.

Hedabideak eta ikus entzunezkoak ikusteko moduak aldatzen doazen heinean, ikusleengana iristeko tresna berriak beharrezkoak dira. Alta, lurraldeko telebista herritarren eskura egotea modu eroso eta erabilgarri batean. Ez soilik Ipar Euskal Herrian, baizik lurralde osora zabaltzeko helburuarekin. Baita munduan barna ere. Lurralde mugarik gabe eta edozein pertsonari irekia.

Zentzu horretan, Kanaldude telebistak pauso berri bat eman du. Hedabidea garatzen eta egokitzen doan heinean, telebista ikusteko zein edukiak nahieran ikusteko modu berrietara egokitzen gara.

Aplikazioaren azala

App-a irekitzen dugularik, goiburuan bilatzailea ikusiko dugu. Bilatzailearen ondoan, intereseko informazioak ikusteko atalera sartzeko botoi marraduna ikusiko dugu. Bertan, Kanaldude telebistaren aurkezpena, laguntzaile izateko irizpideak eta Ipar Euskal Herriko euskal hedabideen inguruko informazioak ikusteko aukera izanen dugu. Baita ere, telebistaren hitzorduen jakinarazpenak jasotzeko filtroa eta asteko programazio osoa ikusteko aukera.

Ondotik, 24 oreneko zuzenekoa erakusten duen leihoa ikusiko dugu. Bertan klikatu eta telebista piztuko dugu. Zuzeneko leihoaren azpian, aste osoko programazioa ikusteko botoia aurkituko dugu. Telebistaren zuzeneko eta programazioare azpialdean, nahieran esperientzian murgilduko gara. “Azken publikazioak” izenburupean, telebistak hedatu azken 3 eduki berriak ikusgai izanen dira.

Azalaren deskribapenarekin bukatzeko, azpialdean bi botoi erabilgarri jarri ditugu. “Zuzenean” botoia aplikazioaren hasierako leihora itzultzeko eta zuzeneko telebistaren ikusteko aukera lehenesten duena, eta “Bideoak” botoioa, nahieran unibertsoan sartuko gaituena. Bertan, lerro ezberdinetan banaturik, azken publikazioak eta sail guztietako azken bideoak ikusgai izanen ditugu.

Aste osoko programazioa

Jakina da telebista batek asteko azpi egunetan 24 orenez edukiak hedatzen dituela. Eduki horien iragartzeko, aste osoko programazioa ikusteko aukera dago App-an. “Programazioa” atalean, astelehenetik igandera hedatuko ditugun eduki guztiak ikusgai dira. Zentzu editorialean, egunero hitzordu berri bat ezarri dugu. Asteartetan Harri salda talkshow-a (hilean behin Herenegun saioa, artxiboko irudietan oinarritua), asteazkenetan seriei eskaini hitzorduak, ostegunetan dokumentalak, ostiraletan musikari zuzendu edukiak, larunbatetan fikzioak eta igandetan ikusgarriak.

Nahieran esperientzia

Kanaldude.eus web gunea oinarri hartuta, telebistan hedatzen ditugun eduki guztiak App-an nahieran ikusteko aukera jarri dugu. Horretarako, sail eta programa ezberdinak nabarmendu ditugu. Sailen artean aurkituko ditugu; Fikzioak, Erreportaiak, Ikusgarriak, Gertakariak, Hitzaldiak, Dokumentalak, Emankizunak, Kirolak, Musika eta Serieak.

Programetan berriz, Jo pilota (esku pilota partidak), Influx (euroeskualdeko magazin kulturala), Harri Salda (asteroko talkshow-a), Zinez (zinemari buruzko saioa), Herenegun (artxiboko irudiekin sortu saioa), Hurbiletik (erreportaiak), Badadoa (bideo jokoak oinarri, gai ezberdinei buruzko gomitak), MUAK (euskal plataforma digitala) eta Hesteka (Rap emankizuna).

Nahieran esperientzian murgiltzeko, bilatzailea ere jarri dugu, erabiltzaileak intereseko edukiak aurkitu ditzan. Bilatzailea, App-ko leiho guztietan ikusgai izanen da.